VIGAN CITY – Maysa a barito ti sumango iti kaso a Robbery Hold up ken panaglabsing ti Omnibus Election Code idiay Brgy. Poblacion Norte, Sta. Maria.
Nabigbig ti suspek a ni John Rey Saoadan Mayo agtawen ti sangapulo ket siam, single ken tubo ti Ayyeng Manabo, Abra ngem agnanaed ti nasao a barangay.
Basar ti imbestigasyon ti PNP, January 15 iti agdama a tawen napan ti tienda ti suspek ket nag-cash in ti Gcash kenni Rosemarie Gatdula agtawen ti lima pulo ket innem ngem saan a nagbayad ti suspek iso nga impaybatina ti cellphonena a maisubli met laeng no makabayad.
January 16 idi kalman kabayatan nga irekepen ti biktima ti tiendana dimteng ti suspek ket inatakarna ti biktima nga adda iti patademna nga ti kaatiddogna ket sangapulo ket maysa a pulgada.
Nagpaarayat ni Gatdula ket dimteng ti nangisalakan kenkuana a ni Daniel Espiritu a manarimaan idi nga agmermerienda iti tienda ti biktima.
Ti agdama iggemen ti PNP ti suspek para iti naananay a dokumentasyon ken pannakaipila ti kaso a sangwenna.
