VIGAN CITY- Imimbestigaran dagiti otoridad ti pannakapapatay ni Aristotle Rubio, tubo ti Negros Occidental ken agdama nga agnanaed idiay San Jose, Narvacan ,ta pinaltugan ni P02 Eduard Garces, a nakadestino idiay Galimuyod police station , agtawen ti 31 ken naasawaan idiay public market ti Narvacan idiay Barangay San Jose.
Segun kenni PC/Insp. Marcelo Martinez, hepe ti narvacan PNP, sakbay iti pammaltog ket mapapati a rinaut ni rubio ti maysa a lalaki a ni Bonifacio Ciubal babaen iti maysa a patadem ta mapapati a kurkuriruen na ti amo na ken nabartek .
Nairana nga adda ti pulis iti lugar isu a napan nagresponde ngem idi nagpabigbig a kameng ti PNP ket mapapati nga inlayat ni Rubio ti iggem na a patadem isu a napursaran ti pulis a paltogan ti biktima.
Inaig iti dayta ket saan pay a nakapatang dagiti imbestigador ni bonifacio Ciubal ket kiniddaw ni Martinez ti tulong dagiti nakakita iti pasamak para iti napaspas a pannakasolbar ti kaso.
Inlawlawag ni Martinez nga uray no posible a ‘self-defense’ ti rason ti pulis ket idarum da latta kas paset ti proseso ket ti piskalyan ton ti agdesisyon no adda ti probable cause na tapno makasuan ti pulis.
