VIGAN CITY – Kaso a panaglabsing iti Republic Act 10591 wenno ti Illegal Possession of Firearms and Ammunition Act ti sangwen ti maysa a lalaki a nakemmeg idiay Brgy. Tablac, Candon City nga iligal nga agik-ikot ti paltog ken bala.
Nabigbig ti suspek a ni Beny Jose Cortez, agtawen iti limapulo ket tallo, Barangay Kagawad nga agnaed iti nasao a lugar.
Ti warrant of arrest ti suspek ket imparuar ni Judge Eilyn Bless Castill-Rimando, Acting Presiding Judge iti MCTC, Galimuyod a napetsaan iti August 28, 2020.
Naala kenkuana ti maysa a unit Norinco caliber 45 pistol, maysa a magasin iti caliber 45, lima a bala iti caliber 45 ken maysa a piraso ti holster.
Addan iti Candon Police Station ti suspek ken dagiti naala nga armas tapno maidalan iti usto a proseso.
