VIGAN CITY – Nakemmeg ni Rodrigo Cayumba, agtawen iti limapulo ket uppat a taga-Paypayad, Candon City iti naiwayat a search warrant operation gapu ti panaglabsingna iti Republic Act 10591 wenno Comprehensive Firearms and Ammunition Act.
Segun ken ni PLt. Marites Nisperos, OIC iti CIDG-Ilocos Sur, nabayag nga ilaklakon ti susopek ti paltog iti maysa a nagipulong iti police station ta nadanagan agsipud ta awan ti papelesna.
Ti search warrant ti suspek ket imparuar ni Presiding Judge Gina Juan-Chan iti First Judicial Region, RTC Branch 71, Candon City a napetsaan iti June 30, 2021.
Naala manipud iti pagtaenganna ti maysa a caliber 45 armscor, magazine iti caliber 45, pito a live ammunition iti caliber 45, maysa a caliber 22 rifle squib man model, dua a piraso ti live ammunition ti caliber 22 rifle ken maysa a piraso ti leather cover ti caliber 22 rifle.
Nakakustodian ti suspek kadagiti pannakabagi ti linteg tapno dumalan iti husto a proseso.
