VIGAN CITY – Natay iti maysa a lalaki ta aksidenten a napaltuganna ti bagina idiay Brgy. Nansuagao, Caoayan.
Nabigbig ti biktima a ni Efren Quicio, agtawen iti lima pulo, awanan asawa, self employed ken agnaed iti nasao a barangay.
Iti pannaki-uman ti Bombo Radyo Vigan ken ni PMaj. Henry Garcia, hepe ti Caoayan Municipal Police Station, nagrespondeda iti mapaspasamak a riri iti nagbaetan ti biktima ken iti kabsatna a ni Elvis Quicio ket inruar ti biktima iti paltog na a 12 gauge buckshot.
Nadanun laengen dagiti otoridad ti bagi iti biktima nga agdigdigos iti bukodna a dara nga adda iti tama iti paltog iti barukongna.
Sakbay a makadanun dagiti pulis, immunan a pimmanaw ti kabsatna tapno maliklikan ti nakarkaro a ririda nga agkabsat.
Simrek ni Efren iti pagtaenganna tapno idulin iti paltog ta napasungadanna dagiti pulis ngem aksidente a nakalbitna ket napurwan ti barukongna.
Naipan ti Ilocos Sur Provincial Hospital Gabriela Silang ti biktima ngem naideklara a dead on arrival babaen iti attending physician na a ni Dr. Kristine Anne Adviento.
