Natay ni Aries Marilla Sebastian, agtawen iti uppat a pulo ket uppat, tubo idiay Poblacion Sur, Urdaneta City, Pangasinan ngem agdama nga agnaed idiay Barangay Laslasong Sur, Sta. Maria, Ilocos Sur ta aksidente a nabekkel bayat ti panagindayonna idi rabii.
Iti pannaki-uman ti Bombo Radyo Vigan ken ni Barangay Captain Gilbert Castro manipod Brgy. Laslasong Sur, Sta. Maria, nadamagna iti pannakatay ni Sebastian isu a nagturong iti pagtaenganna ket nakigtot iti langana ta nabekkel babaen iti indayon.
Segun ken ni Castro, saanda a ginar-garaw ti bangkay ta tinawaganna dagiti polis nga insigida met a nagresponde.
Nupay kanayon nga aginom ket pagaammoda a nasingpet ni Sebastian ta manipod nangnaed iti lugarda ket awan iti nakaririna.
Awan met ti ammoda nu adda ti nagririan ni Sebastian ken ti live-in partner-na ta saanda pay a nakasarita.
VIDEO – BRGY CAPT. GILBERT CASTRO
Pinasingkedan ni PMaj. Macario Dulawan Jr. a hepe iti Sta. Maria Municipal Police Station a nakaawatda iti report inaig iti nagbekkel ngem apaman a nakasangpetda ket naduktalan nga aksidente iti pannakatay ni Sebastian.
Naipan pay laeng ni Sebastian iti Ilocos Sur District Hospital – Narvacan ngem naideklarar a dead on arrival babaen ti attending physician a ni Dr. Mary Grace Asuncion.
Segun ken ni Dulawan, iti inisyal nga imbestigasyonda ket naginom a maymaysa ni Sebastian ta nakita iti dua a botelya iti 2×2 gin nga awan ti kargana ken adda nabati a nagpulutananna ket gapu iti napalaus a nabartekna ket posible nga idi aginana koma iti indayon ket isun iti nakabekkelna ta saannan a naikkat, adda kangato ti indayon a nasurok kumurang maysa a metro.
Nupay kasta, kinuna ni Dulawan nga awan iti makitkitada a foul play iti pannakatay ni Sebastian.
VIDEO – PMAJ. MACARIO DULAWAN JR.
