Lalaki nga agtawen ti innem, nadait ti rupa gapu iti aksidente idiay San Vicente

VIGAN CITY – Namirit iti dait iti rupa ti ubing nga agtawen ti innem nga agnaed idiay Barangay Lubong, San Vicente gapu iti pannaka-aksidente da ti ama na idi alas -8: 40 iti rabii ti October 15 idiay provincial road ti Barangay Bayubay Norte, San Vicente.

Nabigbig ti biktima a ni Kian Montana nga inlugan iti motorsiklo idi ti ama na a ni Rommel Montana nga agtawen ti tallo pulo ket maysa ta mapan da kuma alaen ti ina na nga agtrabtrabaho ti maysa a mall ditoy syudad ti Vigan.

Maibasar iti inisyal nga imbestigasyon, agpapadaya dagiti ama idi mapapati nga inagaw ni Ronnie Rodillas nga agnaed idiay Barangay Pudoc, San Vicente a nagmaneho ti kurong-kurong iti linya da a poon iti nagdinnungparan ti dua a lugan.

Nakaro iti pannakadunor iti rupa ti ubing isu a namirit iti dait idinto a ti ama na ket natukkol ti akin-kannigid nga abaga na ket masapul a malandokan ngem saan pay a naikaskaso agsipud ta awan met iti gastosen da.

Addan iti inisyal a nagpatangan dagiti nairaman iti aksidente ngem kasapulan pay dagiti ama iti naan-anay a tulong, nangruna iti panagpaagas ti ubing ken ti pangpalandok iti abaga ti ama na.