VIGAN CITY – Natay ni Vicente Ruaboro, agtawen ti pito pulo ket maysa, naasawaan ken agnaed idiay Brgy Sta. Monica, Magsingal gapu iti mapapati a pannakaatakena idi naidungpar iti minaneho na a motorsiklo ti maysa a yamaha mio a minaneho ni Andrei Arizmar Alviar, agtawen ti dua pulo ket walo nga agnaed idiay Brgy. Lapting, San Juan.
Nadakamat ni Police Captain Mark Lagman, hepe t Magsingal municipal police station, nga agpapa-amyanan ni Ruaboro idi mapapati nga immagaw iti linya ken naidungpar ti kinasinnabetna a motorsiklo.
Agpada a naitaray idiay Ilocos Sur District Hospital- Magsingal dagiti dua a nagmaneho iti motorsiklo ngem natay ni Ruaboro saan a gapu kadagiti dunor a sinagaba na nu di ket gapu iti pannaka-atake na.
Innayon na a nu saan a mapnek iti pamilya ti biktima iti palawag ti doktor, mabalin da nga ipa-autopsy iti bagi na.
