VIGAN CITY – Makalawas a sinip-siputan ti San Juan Police Station ni Jonel Agbayani agtawen ti uppat a pulo ket dua ken taga Barangay Immayus Sur, San Juan a nakemmeg iti buy-bust operation idi alas dose kwarenta iti malem idi August 26 iti nasao a barangay.
Segun ken ni Police Captain Benjamin Raquedan, hepe ti San Juan Police Station, saan a drug surrenderee ti suspek ngem paspasukoen idin ti dati a kapitan ti Barangay Immayus Sur gapu ta ammo da nga adda koneksyon na iti iligal a droga.
Naala ken ti suspek ti maysa a sachet a naglaon iti mapapati a shabu a nagserbi a buy-bust item, tallo a sachet ti maatap a shabu nga ikot na nga aggatad ti innem a ribo a pisos, dua a sagli-lima gasut a pisos a marked money, maysa a rolyo ti aluminum foil, dua nga improvised a lighter ken maysa a cellphone nga us-usaren na iti iligal a transaksyon.
Ti nasao nga operasyon ket naiwayat babaen iti agtitipon a puwersa ti San Juan PNP, Philippine Drug Enforcement Agency ken Cabugao Maritime Police Precinct.
