VIGAN CITY – Natay iti panagbekkelna ni Russel Funtanilla, agtawen iti sangapulo ket siam a taga-Brgy. Dasay, Narvacan a nasarakan ti kabagyanna a ni Allan Collo, agtawen iti tallopulo ket maysa a nakabitin iti kayo ti mangga, lima a metro ti kaadayona manipud iti talonna a ti inaramatna ket tali.
Mapapati a ti biktima ket immuli iti kayo ti mangga idi ingalutna ti tali a pinagtitinnulongan met dagiti gayyem ken kabagyanna a winarwar ken nangibaba iti bangkayna.
Segun ken ni P/Maj. Arcadio Viloria, nagiinom ti biktima ken dagiti gayyemna iti rabii ti December 10 iti balay ti nakasarak kenkuana a nagbekkel.
Pimmanaw ti biktima kalpasan ti sumagmamano nga oras iti panagiinomda ngem nupay kasta, pinasingkedan ti gagayyem ken kabagyan ti biktima nga awan met ti parikutna.
Im-imbestigaran dagiti pannakabagi ti linteg no adda pakainaigan iti panagpakamatay ti biktima iti pannakaawat ti naudi nga “I love you” message ni Epifany Collo manipud iti biktima.
Malaksid ti dayta, nadakamat pay ti kabsat ti biktima a mapapati a no dadduma ket makurkurangan iti kuarta ta dumawdawat ken agpagpagatang iti motorsiklo iti kabsatna idiay abroad.
