VIGAN CITY – Kaso a panaglabsing ti Republic Act 8484 wenno Access Devices Regulation Act ti sangwen ti nakemmeg a suspek iti naiwayat nga entrapment operation idiay Brgy 1, Vigan City gapu iti iligal a panangilakona ti modem babaen iti online.
Segun ken ni Police Corporal Lee Altares ti Vigan city Police Station, awan iti dati a nakaidaruman ti suspek a Hernando Corpuz, agtawen ti uppat a pulo ket maysa, mannalon ken agnaed idiay Brgy Tay-ac, Bantay a kas maibasar iti record ti PNP.
Naala kenkuana idi kalman ti tallo ribo sangagasut a pisos, dua a yunit iti modem ken charger.
Mapapati nga ilaklako ti suspek ti modem iti gatad a sangaribo lima gasut a pisos iti tunggal maysa idinto a ti usto a gatadna ket innem a ribo a pisos.
Naduktalan nga awan iti pammalubos ti kompania kenkuana a mangilako iti nasao a produkto agsipud ta kimmuyog pay iti entrapment operation ti maysa kadagiti mangibagi ti kompanya nga akin-kukua ti modem.
Agsipud iti dayta, nagbalakad ni Altares kadagiti agus-usar iti modem ken kadagiti plano na iti gumatang a kadagiti otorisado a supplier laeng iti gumatangan da agsipud ta nu saan ket masayang laeng iti ingatang da ta nu mamonitor ti kompanya ket mabalin da a putden iti linyana ket saan danton a mausar.
