VIGAN CITY – Kaso a panaglabsing iti Republic Act 10591 wenno ti Illegal Possession of Firearms and Ammunition Act ti sangwen ti maysa a lalaki a nakemmeg idiay Nagsabaran, San Juan gapu ti panagikotna iti saan a lisensyado a paltog.
Iti pannaki-uman ti Bombo Radyo Vigan ken ni Police Lt. Jackson Sugayen, officer-in-charge ti San Juan PNP, saan a limmaban kadakuada ti suspek a ni Amado Ventura, agtawen ti uppat a pulo ket siam nga agnaed iti nasao a lugar kabayatan iti panangkemmegda kenkuana.
Insigida a nagresponde dagiti pannakabagi ti linteg idi adda naipadanun kadakuada nga adda ti mapaspasamak a riri iti nasao a lugar isu a naaktuanda ti suspek a nakaiggem ti maysa a homemade single shotgun nga awanan ti marka ken adda balana iti 12 gauge shot gun.
Mapapati nga adda ti saan a pagkinnaawatan ti suspek iti kaarubana a ni Edwin Tapuro nga isu ti rason no apay a pinaturonganna ti paltog.
Nupay kasta, addan iti kustodiya ti San Juan Police Station ti suspek ken ti nakumpiskar nga armasna tapno maidalan iti usto a proseso.
