Lalaki nga adda parikut ti panagpampanunotna iti ili ti Sta. Lucia, mapukpukaw

VIGAN CITY – Mapukpukaw ni Rolly Alay-ay Mina, agtawen iti tallopulo, agnaed iti Barangay Damacuag, Sta. Lucia ken adda parikut ti panagpampanunotna.

Personal a nagturong iti kapulisan ti ina ti mapukpukaw a ni Mina, awanan trabaho ken agnaed iti Barangay Damacuag, Sta. Lucia tapno ireport ti mapukpukaw nga anakna.

Segun kenkuana, pinanawan ti anakna ti pagtaengan ti ikitna a ni Herminia Sanchez Artatez, agnaed iti Barangay Nangalisan, Sta. Lucia iti alas siete iti rabii ti Mayo 22 ken saanen a nakasubli agingga iti agdama.

Ti mapukpukaw ket adda katayagna a 5’6, mapatta-patta a 58 kgs, kayumanggi ti kolorna ken black ti buokna.

Kadagiti nakakita ket maikidkiddaw nga ipakaammoda kadagiti pannakabagi ti linteg wenno iti pamiliana.