Nakemmeg ti maysa a lalaki a mapapati nga adda parikut ti panagpampanunotna gapu iti panangtagbatna iti maysa a menor de edad idiay Barangay Ampuagan, Sta. Maria, Ilocos Sur.
Ti biktima ket agtawen iti sangapulo ket innem, Grade 11 student, taga-Barangay Langaoan, Sta. Maria idinto a ti suspek ket agtawen iti limapulo ket maysa, mannalon, agnaed iti Barangay Ampuagan.
Iti pannaki-uman ti Bombo Radyo Vigan ken ni PLT. Jenson Refuerzo, rimuar manipud iti kamaisan ti suspek ket nasabetna ti nakamotorsiklo a biktima a mapan gumatang gasolina idin ta bigla a tinagbatna a nakadunoran ti akin-kannigid a sikona.
Dagus a timmaray a napan iti kataltalunan ti suspek isu a nangiwayat met ti Sta. Maria Police Station iti hot pursuit operation a nakakemmegan ti suspek.
Nakumpiskar ti buneng a 52 centimetro ti rukodna agraman ti apputanna.
Naikustodian iti Sta. Maria Police Station ti suspek tapno dumalan iti husto a proseso idinto a ti biktima ket nakaruar metten iti ospital.
