VIGAN CITY – Insayangkat dagiti pannakabagi ti linteg iti entrapment operation iti Stern Mall, Barangay San Nicolas, Candon City a nagresultaan ti pannakakemmeg ni Michael Cordero Haban, agtawen ti tallopulo ket pito, ken residente ti Barangay Catayagan, Sta.Lucia gapu iti panaglabsingna iti RA 10175 wenno Robbery Extortion.
Personal a nag-report iti Candon City Police Station ti biktima a ni Roberto Mundo Habab, maysa nga OFW, agtawen ti limapulo ket siam, kadua na iti live-in partner na a ni Maritess Galanco Isidro, agpada nga agnanaed iti Barangay Sapang, Sta.Lucia, gapu ta adda pangta iti biagna.
Segun ti biktima, impakaamo ti kasinsinna a ni Arnold Habab, maysa nga OFW idiay Canada, nga adda natangdanan a saan pay a nabigbig a gun-for-hire iti gatad nga P80,000, isu a kiniddaw ni Arnold iti mapapati a gunman a saanna a papatayen ti kasisinna, ngem nagkiddaw ti suspek iti P50,000 kasukat ti biag ti nasao a biktima.
Gapu dayta nagtignay nga insigida dagiti pannakabagi iti linteg a nagresultaan ti pannakakemmeg ti nasao a suspek, ken nakakumpiskaran kenkuana ti maysa a Cellular phone, PHP31,500 a boodle money, ken P1,000 genuine banknote.
Iti agdama, addan ti suspek iti Candon City Police Station agraman ti minaneho na a pick-up nga agmaris ti puraw a Ford Ranger para iti proper disposition.
