VIGAN CITY – Tama ti rupa ken bagi ti sinagaba ti lalaki a pimmusay ta pinaltogan dagiti saan pay a nabigbig a suspek idiay Sitio Paddual, Brgy. Pug-os, Cabugao, Ilocos Sur.
Iti pannaki-uman iti Bombo Radyo Vigan ken ni PMaj. Franco Catalan iti Cabugao Municipal Police Station, adda iti naawatda a report a mapapati a naaksidente ti motorsiklo ngem idi nagrespondeda ket naamwanda a biktima iti pammaltog ni Harry Garma Savellano, agtawen ti tallopulo ket walo, awanan ti trabaho nga agnaed iti nasao a lugar.
Segun ken ni Catalan, manarimaan pay laeng iti panangkumpirmarda kadagiti CCTV footage iti posible a nagnaan dagiti suspek a makatulong iti imbestigasyon inaig ti pasamak.
Kitkitaendan nu adda kainaigan ti pannakatay ni Savellano iti maipapan ti droga ta datin a simmuko kas drug user ken pusher kasta pay a mapapati a dati a kameng ti gun for hire.
Kabayatanna, mapapati a Cal. 45 a paltog iti naaramat iti nasao a pammaltog.
Iti agdama ket manarimaan pay laeng iti imbestigasyonda inaig iti nasao a pasamak.
