Dead on arrival ti ospital ti maysa a lalaki ta nabagkong kalpasan a nagtinnulongan dagiti agkabsat a kabagayanna idiay Barangay Cabaroan, Magsingal.
Ti biktima ket ni Jerry Timkang Ursua, agtawen iti tallopulo ket maysa a collector idinto a dagiti agkabsat ket da Emil Ulibas Mabini, agtawen iti duapulo ket pito, baro ken ti kabsatna a ni Ronald Ulibas Mabini, agtawen iti tallopulo ket tallo, baro nga agpapada nga agnaed idiay Barangay Cabaroan, Magsingal.
Iti pannaki-uman ti Bombo Radyo Vigan ken ni PLt. Richard Pajo manipod Magsingal Municipal Police Station, nakaawatda iti pakaammo manipod Ilocos Sur District Hospital-Magsingal maipanggep ti pannakabagkong ti biktima isu a nagrespondeda.
Segun ken ni Pajo, daan a susik iti mapapati a nagtaudan ti saan a nagkinnaawatan ti biktima ken dagiti suspek ket iti panagsisinnungbatda, nangala ni Emil Mabini iti kutsilyo ken induyokna iti bakrang ti biktima.
Gapu ti sinagaba a dunor ti biktima ket impan dagiti kabagyanna iti ospital ngem naideklarar a dead on arrival babaen ti attending physician.
Insayangkat nga insigida dagiti otoridad ti hot pursuit operation a gappuanan ti pannakakemmeg dagiti suspek.
