Dead on arrival iti ospital ni Joshua Rodiño Bañaga, agtawen iti tallopulo ket dua, collector iti San Basilio Cooperative, naasawaan a taga-Barangay Bungro, Magsingal, Ilocos Sur ta pinaltogan dagiti saan a nabigbig a suspek idi alas otso idi rabii, November 14, 2024.
Nakaawat ti tawag ti Magsingal Municipal Police Station manipod ken ni Arman Tolentino a nangipakaammo iti napasamak a pammaltog idiay Barangay Bungro, Magsingal isu a nagresponde dagiti otoridad ngem idi nakadanonda ket naipanen iti kaasitgan nga ospital ti biktima.
Agpapaamianan a direksyon ti biktima bayat a nakalugan iti nangisit a Honda Beat a motorsiklo idin pinaltogan dagiti saan a nabigbig a suspek nga adda iti likodna iti mamin-tallo a daras, ket kalpasanna naglibas dagiti suspek a nagturong iti bagatan a direksyon.
Nagsagaba ti biktima ti gunsot wounds iti likodna isu a naipan iti Ilocos Sur District Hospital-Magsingal ngem saanen a nakalasat pay babaen ti panangideklarar ni Dr. Roberto Villalon.
Naisayangkat ti dragnet operation kadagiti kabangibang a Police Station para ti posible a pannakakemmeg dagiti suspek.
