Maysa a lalaki nga agtawen iti tallopulo ket uppat a mannalon iti nangkettel iti bukod a biagna idiay Tagudin, Ilocos Sur.
Nakaawat ti pakaammo dagiti kameng ti Tagudin Municipal Police Station mainaig iti pannakasarak iti biktima a nakabitin manipod iti sanga iti Gmelina a kayo babaen iti tali a tallo a metro iti kaatiddogna.
Segun ti ama ti biktima, tunggal maka-inom ti putotna ket ibagana latta nga agbekkel ket maikatlo a gundawayen nga imbagana a kettelenna iti bukodna a biag.
Kinuna ti kasinsin ti biktima a bayat iti panaginomda idi rabii iti September 13, 2025 ket napansinna a naka-iggem ti kasinsinna iti tali ken namin-anona nga impangta nga agbekkel.
Iti bigat idi kalman, September 14 ket naduktalan ti ama ti biktima iti panagbekkel ti putotna idi mapanna koma iwayway ti bakana iti asideg iti karayan isu a dagusna a pinuted ti tali babaen ti panangusarna ti buneng.
Naideklarar ti biktima a natay babaen ti Municipal Health Officer iti Tagudin Rural Health Unit.
