VIGAN CITY – Natalgeden ti kasasaad ti lalaki a napaltogan bayat a nakalugan iti kotsena a naggapu manipod iti Vigan City Cockpit Arena idiay Brgy. Beddeng Daya, Vigan City.
Iti pannaki-uman ti Bombo Radyo Vigan ken ni PEMS Chester Dandin a chief investigator iti Vigan City Police Station, saan unay a napakaroan ti biktima a ni Florante Racoma, agtawen iti limapulo ket maysa, naasawaan, dati a barangay a captain nga agnaed idiay Pudoc Sur, San Vicente ta nakareport pay laeng iti istasyon uray nadunor iti nadumaduma a paset iti bagina.
Segun ken ni Dandin, nakalugan iti kotse ni Racoma idi nagbwelta manipod galyeraan idiay Brgy. Beddeng Daya ket adda iti nangpaltog kenkuana iti namin-ano a daras ngem saanna a nakita dagiti suspek ta nagparsiak dagiti napittak a paset ti sarming ti luganna kenkuana.
Nadunor ni Racoma iti akin-kannawan a paset ti ulo, akin-kannawan a takyag, akin-kannigid a dakulap ken akin-kannawan a paset iti tiyanna isu a dara-dara a nagturong iti Vigan City Police Station.
Gapu ti sinagaba a dunor ti biktima ket naipan nga insigida iti Ilocos Sur Provincial Hospital Gabriela Silang para ti pannakatamingna.
Manarimaanen iti panagkalap dagiti pannakabagi ti linteg inaig iti posible a makaited ti impormasyon inaig iti nasao a pammaltog.
VC – PEMS CHESTER DANDIN
