VIGAN CITY-Awan ti nakita dagiti otoridad a foul play iti pannakatay ni Juan Tadeja, agtawen ti 60 ken taga Sitio Quillayan, Lussoc, Sto. Domingo a bangkayen idi nakita da iti uneg ti bodega ti pagtaengan na.
Segun kenni PS/Insp. Arcadio Viloria , hepe ti Sto. Domingo municipal police station iti interview ti Bombo Radyo Vigan, nakita dagiti otoridad ni Tadeja a nakatugaw iti monoblock chair nga awanen ti biag na ken adda marka ti tali iti tengged na ta mapapati a ginandat na ti nagpakamatay.
Segun kadagiti kakabagyan ti biktima , ti tali a nakita iti rooftop ti kuarto ti biktima nga asideg iti bodega ket isu ti pagkaptan na no bumangon.
Naammuan a maymaysa laeng nga agbibiag ti biktima ken agsagsagaba ti sakit iti barokong na.
Saanen metten nga immanamong ti pamilya ti biktima a maidalan iti otopsiya ti bangkay na ta patien da nga awan ti foul play ti napasamak.
