Maysa a lalaki ti nasarakan a natay iti uneg ti pagtaenganna idiay Barangay Langlangca 2nd, Candon City, Ilocos Sur.
Nabigbig ti lalaki a ni Rodrigo Torricer Salasac, agtawen iti limapulo ket dua, agnaed iti nasao a lugar.
Iti pannaki-uman ti Bombo Radyo Vigan ken ni PLT. Jovelyn Antalan, alas dyes y media iti rabii ti June 27, 2025, binaon ni Strelita Vergara ti siumanna a lalaki a ni Mark Angelo Garcia Salasac a mapan kitaen ti amana iti pagtaenganda, ta sipud June 23, 2025 ket saanen a simmungsungbat kadagiti tawag ken mensahe.
Alas dyes kwarenta y singko iti bigat, napan ni Mark Angelo iti pagtaengan ti amana, ket idi makasangpet, adda naangotna a kasla natay a bao, ngem impagarupna idi damo nga amangan ta ti nalungsot a paltat nga ilaklako ti amana.
Sinapulna ti amana iti uneg ti pagtaenganna agingga a nakita ni Philip Joshua Portem a nakadasay ni Salasac iti dirty kitchen iti ruar ti pagtaengan.
Nadlawda pay a nakalukat ti main door ti pagtaengan ni Salasac, numan pay nakarikep met ti gate-na.
Dagus nga inreportda kadagiti pannakabagi ti linteg, ngem nupay kasta, awan met ti pagilasinan iti foul play wenno external injury ta segun ken ni Mark Angelo, agsagsagaba ti amana iti high blood pressure ken polio.
