Nasarakan nga awanen iti biag ti maysa a lalaki bayat a nakatugaw iti likod ti tricycle iti sangwanan ti cockpit arena idiay Santiago idiay Barangay Sabangan, Santiago, Ilocos Sur idi kalman, February 11, 2025.
Ti lalaki ket nabigbig a ni Reynaldo Gamilde Manzano, agtawen iti limapulo ket innem, baro, tricycle driver nga agnaed idiay Barangay Tablac, Candon City.
Iti pannaki-uman ti Bombo Radyo Vigan ken ni Police Staff Sergeant Suerte Barbero a Chief Investigator iti Santiago Municipal Police Station, adda nakapansin a rumrumuar ti dara iti ngiwat ni Manzano ta adda pay nakita a dara iti baba isu nga inasitganda ket idi makitada iti sitwasyonna, impakaammoda nga insigida kadagiti otoridad ken iti Rural Health Unit.
Segun ken ni Barbero, posible kinapudot iti rason ti panagbakwar ni Manzano a napan iti galyeraan ta naammoan nga adda hypertension-na, isu a mapapati a napan iti traysikel a nagpaangin ngem isu metten iti panagbakwarna iti dara.
Indeklarar ni Dr. Vida Doria Berto a Municipal Health Officer a natayen ni Manzano iti oras ti alas kuatro kinse iti malem idi kalman.
Nupay kasta, awan ti foul play iti nasao a pasamak ta awan iti aniaman a senyales nga adda nangdangran ken ni Manzano.
