Maysa nga agtawen-iti-uppat a pulo ket dua a lalaki ti naitaray iti ospital gapu iti pannakasabidongna kalpasan a nangan iti butete wenno puffer fish idiay Barangay Puro, Magsingal, Ilocos Sur.
Segun iti ina, kinnan ti biktima ti bugi ti butete a napanda pinana iti karabianna.
Kalpasan ti pannangan ti biktima, nakarikna daytoy iti panagbibineg ti ngiwat, panagdul-ok ken narigatan nga umanges isu nga intarayda iti ospital.
Nupay kasta, adda itan iti natalged a kasasaad ti biktima.
Kabayatanna, nagballaag ni Dr. Alden Gangani manipud iti Ilocos Sur District Hospital – Magsingal a maiparit ti pannangan iti kastoy a klase nga ikan nagruna no saan nga ammo no kasano ti husto a wagas ti pannakalutona ta addaan daytoy iti toxin a maawagan iti tetrodotoxin a napigsa a makasabidong.
Inlawlawag ti nasao a doktor a no maipauneg ti kastoy a klase ti toxin ket apektaranna ti nervous system isu a masansan a marigatan nga umanges dagiti pasyente.
