Natay ti maysa nga agtawen iti duapulo ket innem a lalaki gapu iti pannakalmesna iti kabaybayan ti Barangay San Sebastian, San Vicente, Ilocos Sur.
Nabigbig ti biktima a ni Mark Shane Dulnuan Ballatong, agtawen iti duapulo ket innem, technician, tubo iti Ifugao ngem agnanaed iti Cabaroan Daya, Vigan City.
Iti met pannaki-uman ti Bombo Radyo Vigan ken ni Barangay Kagawad Allan Redulme, nag-picnic ti biktima kadua ti asawa ken dagiti pay kaduada idin ta napan nagdigos ti biktima.
Nakangngeg ti live-in partner ti biktima nga adda agpukpukkaw ngem saanna idi a masinuno no paggapgapuanna.
Apaman a maitawag kadakuada ti pasamak, dagus a narespondean ket kalpasan ti tallopulo a minutos a kapaot ti panangsapulda, nasarakan a tumtumpaw ti biktima.
Naipaagas iti ospital ti biktima ngem naideklarar a dead on arrival.
Nupay kasta, naituding a mapagnunumuan ti barangay no ania dagiti aramidenda nga addang tapno saanen a maulit ti napasamak.
