Nakemmeg ti maysa a lalaki a nagtakaw iti bag iti sinerrekna a pagtaengan idiay Barangay San Julian Norte, Vigan City.
Ti biktima ket maysa a lalaki, agnaed iti Barangay Capangpangan, Vigan City idinto a ti suspek ket taga-Tondo, Manila.
Maibasar iti inisial nga imbestigasion, agarup ala una iti parbangon, mapapati a sinerrek ti suspek ti pasdek negosio ti biktima ngem gapu ta saanna a nalukatan daytoy, bimmangir ti suspek a napan iti balay ti biktima nga isu ti nangtakawanna iti bag a naglaon iti kuarta ken ddduma pay.
Babaen iti panangkita iti CCTV footage, natunton ti suspek iti maysa a pagdagusan wenno apartment iti Barangay San Julian Norte.
Iti imbestigasion ti kapulisan ket nakita a nagpada ti langa dejay suspek iti adda ti CCTV babaen kadagiti tattoo-na ken ti suot-na a jacket.
Nangiwayat ti kapulisan ti search warrant iti kuarto ti suspek ket nakita ditoy ti inaramat a jacket ti suspek a napan nagtakaw.
Saan a nasarakan ti natakaw a bag iti kuarto ti suspek ngem babaen iti panangsaludsod ti biktima iti suspek no nangikkanna ket naibagana nga impurwakna iti maysa a bakante a lote agingga a masarakan met daytoy nga awanen ti linaonna.
