Nakemmeg ti maysa a lalaki a naduktalan nga agik-ikot iti iligal a paltog ken mapapati a marijuana iti kamposanto idiay Barangay Poblacion Sur, Sta. Maria, Ilocos Sur.
Ti suspek ket agnaed iti nasao met laeng a lugar.
Nagresponde dagiti kapulisan iti report nga adda sabsabali nga uni manipud iti kamposanto ket idi makasangpetda, nadlaw ti suspek dagiti pulis isu nga insigida a naglibas, ket naiwayat met ti hot pursuit operation.
Idi madanonan ken makemmegda ti suspek, naala dagiti pulis ti aglatlati nga improvised caliber 38 revolver nga awan balana ken serial number nga imbellengna idi naglibas.
Idi makapkapan met ti suspek, naala kenkuana ti maysa a silver cigarette foil wrapper a naglaon iti nasurok-kumurang 3.9 grams ti mapapati a napagango a bulong ti marijuana nga aggatad iti P468, ken lighter.
Sumango ti suspek iti kaso a panaglabsing iti Republic Act 10591 o Comprehensive Firearms and Ammunition Regulation Act ken Republic Act 9165 o Comprehensive Dangerous Drugs Act of 2002.
