Nakemmeg ti maysa a lalaki iti naisayangkat a buy-bust operation idiay Quimmarayan, Sto. Domingo, Ilocos Sur idi kalman, May 8, 2025.
Ti suspek ket agtawen iti uppat a pulo ket dua, naasawaan nga agnaed iti nasao nga ili.
Iti pannaki-uman ti Bombo Radyo Vigan ken ni PCpt. Rodel Ragasa iti Sto. Domingo Municipal Police Station, ti suspek ket nakemmeg idin gapu iti panagilakona iti shabu isu a naidalan iti probation ngem namonitor manen iti illegal nga aramidna a gappuanan ita ti pannakakemmegna.
Segun ken ni Ragasa, nakadlaw ti suspek a polis ti katransaksyonna isu a pinanggepna iti lumaban ngem dagus a nakaresponde dagiti dadduma pay a kameng iti kapolisan.
Naala manipod ti suspek ti nasurok-kumurang 1.52 a gramo iti mapapati a shabu nga aggatad ti P10,336 a naipan iti uppat a piraso iti heat sealed transparent plastic sachets.
Dagiti non-drug evidence a naala ket pakairamanan ti maysa a P1,000 a nagserbi a buy-bust money, dua a piraso iti P100, maysa a posporo, maysa a motorsiklo ken maysa a unit iti cellphone.
