Lalaki, nakemmeg iti buy-bust operation

Nakemmeg ti maysa a lalaki nga agtawen iti uppat a pulo ket maysa babaen iti naiwayat a buy-bust operation iti ili ti Narvacan.

Ti suspek ket maysa a mannalon, agnaed iti nasao nga ili.

Nakumpiskar kenkuana ti nasurok kumurang 1.1 grams ti mapapati a shabu nga aggatad iti P7,480 a naikabil iti heat sealed transparent plastic sachet.

Dagiti non drug evidence ket pakairamanan ti maysa a homemade 12-gauge paltik, dua a P1,000 boodle money nga isu ti nagserbi a buy-bust money, cellphone, lighter, pitaka, tulbek ti lugan, ken sling bag.

Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.