Nakemmeg ti maysa a lalaki gapu iti mapapati a panangtakawna iti cellphone ti maysa nga student athlete iti R1AA iti Darapidap Elementary School idiay Barangay Darapidap, Candon City, Ilocos Sur.
Ti maatap a suspek ket agtawen iti uppat a pulo ket siam nga agnaed idiay Barangay Ili Sur, San Juan, La Union idinto a ti biktima ket agtawen iti sangapulo ket dua nga R1AA participant nga agnaed idiay Barangay Saoay, San Fernando, La Union.
Iti pannaki-uman ti Bombo Radyo Vigan ken ni Kennedy Flores nga Education Program Specialist wenno Information Officer Designate iti San Fernando, La Union, apaman a naipakaammo kadakuada iti napasamak a panagtakawan idi rabii, April 7, 2026 iti nasao a pagadalan ket insigidada nga impakammo ken nakikammayetda kadagiti otoridad.
Segun ken ni Flores, babaen iti CCTV footage ket nabigbig ti maatap a suspek ngem saan a naisubli iti black iPhone 11 a cellphone ti student athlete isu a nakemmeg ti suspek.
Kinuna ni Flores a pinaingetanda iti seguridad iti pagadalan tapno saanen a maulit iti kas iti nasao a pasamak.
Kabayatanna, iti baet ti insidente ket pagyamanan ni Flores iti nabara a panangpasangbay iti Candon LGU, Candon City High School ken Darapidap Elementary School kadakuada a delegates iti nasao a pagadalan.
Innayonna a nasurok walogasut iti delegation manipod San Fernando City Division a pakairamanan dagiti atleta, coaches, assistant coaches, officials trainers ken dadduma pay.
