VIGAN CITY- Nadait iti akin-kannawan a paset iti ulo ken akin-kannawan a saka ni Oscar Soliven Jr nga agtawen iti dua pulo ket maysa a taga- Calay-ab, Sto. Domingo gapu iti pannaka-aksidente iti nagluganan na a motorsiklo idiay national highway ti Brgy. Poblacion East, San Ildefonso idi kalman, February 28, alas syete kinse iti rabii.
Segun ti nagmaneho ti Toyota Avanza a ni Agrifino Pugat nga agtawen iti uppat a pulo ket innem, baro, operations manager iti maysa a pagtagilakwan ken taga- Quiling Sur, Batac, Ilocos Norte, agpapa-amyanan isuna iti nasao a kalsada idi agsikko nga agpakannigid ket nakigtot ta adda iti nangngeg na a dimmungpar iti likudan ti lugan ket nakita na laengen ti biktima a naipurwak iti shoulder ti kalsada gapu ti pigsa iti impact iti pannakaidungpar na.
Kumpirmado met a nakainom ti biktima idi napasamak iti aksidente ket agpapatang da pay nu adda iti maipila a kaso wennu agiinnareglo da laengen.
