Sapsapulen dagiti pannakabagi ti linteg ti Sugpon Police Station ti maysa a lalaki a nagpangta a paltuganna ti kalugaranna idiay Barangay Balbalayang, Sugpon, Ilocos Sur.
Nabigbig ti suspek a ni Jessie Alin-ew Sagulo, agtawen iti duapulop ket maysa idinto a ti biktima ket ni Teody Sakiwat Gabat Jr., agtawen iti uppat a pulo ket maysa, construction worker, agpada nga agnaed iti nasao a lugar.
Agin-inom ti biktima ken suspek iti pagtaengan ni Christopher Guzman idin ta napanda iti natayan ket bayat ti pannagnada kangrunaan iti sangwanan ti simbaan, nagpangta ti suspek a paltoganna ti biktima kagiddan ti panangasotna iti paltog iti bag-na sa ginandatna a paltugan ti biktima.
Kinalbit ti suspek ti paltogna iti namin-dua a daras ngem saan a nagputok.
Nagginnubal dagiti dua agingga a naagaw ti biktima ti paltog ket impurwakna idinto a ti suspek ket naanawa ken natengngel ni Philippine Antok.
Ngem idi makasangpet dagiti barangay tanod, nakatalaw ti suspek manipud iti panangtengtengngel ni Antok ket naglibas.
Addan iti kustodia ti Sugpon Police Station ti caliber 38 a paltog a nausar ken kaso a Grave Threat ti maipila kontra iti suspek.
