VIGAN CITY– Sakit iti panagpanonot ti mapapati a rason iti nagbekkelan ti maysa a lalaki idiay Candon City, Ilocos Sur iti sangunan a mismo ti ina na.
Nabigbig ti biktima a ni Rizalino Reotutar Galinato, agtawen ti 52 ken taga Barangay San Jose, Candon City.
Segun kenni PSupt. Reynaldo Lizardo, hepe ti PNP-candon, inpakaammo ti kabsat ti biktima nga agsagsagaba iti hallucinations ni Galinato a mapapati a naala na iti trabaho nga agpinpinta.
Naipakitan idi iti psychiatrist ni Galinato ngem idi naibos ti agas na ket saan nan nga intultuloy iti nagtumar.
Maipalagip a nagbekkel ti biktima iti uneg ti kuarto da iti inana babaen ti electric wire.
Patien met iti pamilya na nga awan iti napasamak a foul play iti pannakatay na.
