VIGAN CITY – Saan a namnamaen ti pamilia ken dagiti Barangay Official iti Capangdanan, Bantay iti panagbekkel ni Richard Edra, agtawen ti uppat a pulo ket maysa, naasawaan nga agnaed iti nasao a lugar.
Itattay bigat iti oras iti alas sais y media a nasarakan a pimmusay ni Richard babaen iti pannakaigalot ti tengngedna iti tali iti baka kas pinasingkedan ti asawana a ni Jonalyn Edra a nakakita kenkuana.
Iti pannaki-uman ti Bombo Radyo Vigan ken ni Jonalyn, idi rabii ket namintallo a narespondean ti asawana a nabarbartek gapu iti panagibarbarsakna iti masetas iti arubayanda.
Kalpasan iti maikatlo a panagresponde dagiti opisyal ti barangay ket nagtalnan ni Richard isu a pimmanawen da Jonalyn ta nagbutengda iti posible a maaramidna kadakuada ngem idi nakariingen itattay bigat ket napan iti kusina iti pagtaenganda ket nakitanan a nakabitin ti asawana isu a nagpaarayat kadagiti karrubana ket impanda idiay Northside Doctors Hospital ngem naideklarar a dead on arrival.
