Dunor iti akin-kannigid a pingping ti sinagaba ti maysa a lalaki kalpasan a tinagbat ti kabsatna idiay Barangay Tarangotong, Tagudin, Ilocos Sur idi rabii, April 20, 2026 .
Ti biktima ket agtawen iti limapulo ket pito ken naasawaan idinto a ti suspek ket agtawen iti innem a pulo naasawaan nga agpada nga agnaed idiay Barangay Tarangotong, Tagudin.
Iti pannaki-uman ti Bombo Radyo Vigan ken ni PSMS Mark Jason Sanchez iti Tagudin Municipal Police Station, iti ti witness ket simmangpet ti suspek manipod iti trabahona ket binilinna ti biktima nga iddepen iti silaw ngem sinungbatanna daytoy babaen ti panangsaludsod no apay nga ipiddepna ket saan met nga isu ti mangbaybayad, agingga nagsinsinnungbatda.
Segun ken ni Sanchez, nagpidot ti bato ti biktima ket imbansagna iti ayan ti suspek ngem saan a natamaan ngem napan ti suspek iti pagtaenganna ket nangala ti panabas ket kinamatna ti biktima ket idi impadas ti biktima nga aglinged iti mula iti saba ket intagbat latta ti suspek ti iggemna iti kasabaan ngem napagaw-atan latta ti rupa iti biktima.
Naipan ti biktima iti ospital para iti pannakatamingna ken uray ti suspek ket naipan met laeng iti ospital ket naduktalan nga agpadada a naka-inom iti arak idi napasamak iti insidente.
Naala iti nasao a nakapasamakan ti pannagbat ti panabas a nasurok-kumurang 20 pulgada iti kaattiddogna agraman iti apputanna.
Naammoan iti imbestigasyon nga awan iti riri idi kallabes dagiti agkabsat isu a pagarupen dagiti otoridad nga impluwensya laeng ti arak iti pasamak.
No pay kasta ket isagsaganan dagiti otoridad ti compromise agreement and affidavit of disinterest to file a case.
