VIGAN CITY – Naipaagas iti ospital ni Arnel Paino, agtawen iti uppat a pulo ket maysa, construction worker a taga-Nambaran, Sto. Domingo gapu ti sinagabana a dunor ta pinaltogan ti katuganganna a lalaki a ni Rogelio Ped, agtawen iti innem a pulo ket innem, mannalon kagiddan iti pannakatinnagda nga agpada iti nauneg a bubon idi May 22, 2021.
Iti pannaki-uman ti Bombo Radyo Vigan kenni PLT. John John Garan iti Sto. Domingo Police Station, nakainom ti biktima a nagawid ket nagsinnungbatda ti asawana isu a naganawa ni Ped ngem saan nga inkaskaso ni Paino a gappuanan iti panangpaturongna iti air gun.
Inlawlawagna a naginnagawda iti air gun agingga naggubalda ket agpadada a natnag iti naadalem a bubon a gappuanan iti panagputok ti airgun a nakatamaan ti muging ti biktima.
Nupay kasta, nakakustodiyan ti suspek kadagiti pannakabagi ti linteg tapno maidalan iti husto a proseso.
