Dunor iti tiyan ti sinagaba ti maysa a lalaki ta binagkong ti kayongna idiay Barangay Fuerte, Caoayan, Ilocos Sur idi alas onse iti rabii, March 20, 2026.
Ti biktima ket lalaki nga agtawen iti limapulo ket walo, naasawaan ken mangngalap idinto a ti suspek ket kayongna nga agtawen iti uppat a pulo ket tallo, naasawaan, construction worker nga agpada nga agnaed idiay Barangay Fuerte, Caoayan.
Iti pannaki-uman ti Bombo Radyo Vigan ken ni PLt. Joy Callejo a Deputy Chief of Police iti Caoayan Municipal Police Station, agin-inom ti biktima kaduana ti gagayyemna iti pagtaenganda idi dimteng ti suspek ket adda saanda a nagkinnaawatan a gappuanan iti panagala ti suspek iti kutsilyo iti uneg iti pagtaenganda nga isu iti induyokna iti biktima.
Segun ken ni Callejo, gapu ti dunor a sinagaba ti biktima ket impan dagiti kameng ti pamiliana iti Ilocos Sur Provincial Hospital-Gabriela Silang para iti pannakatamingna idinto a ti suspek ket nakemmeg iti pagtaenganda ken insukona iti kutsilyo nga inaramatna.
Kinuna ni Callejo nga adda datin a saan a pagkinnaawatan ti suspek ken biktima maipanggep iti panagusar iti videoke idi kallabes a posible a rason iti pammagkong.
Desidido ti pamilia ti biktima nga agipila ti kaso kontra iti suspek.
Kabayatanna, pinasingkedan ti suspek nga adda kinagurana idi simmangpet isuna manipod iti pasken idiay Manangat isu a nabagkongna ti biktima.
Linagipna maipanggep iti videoke a nagririanda idi a mapapati a nagpuonan iti saanda manen a nagkinnaawatan iti biktima.
