Nadunor iti maysa a lalaki kalpasan iti pammaltog idiay Barangay Cabulalaan, Sinait, Ilocos Sur.
Iti pannaki-uman ti Bombo Radyo Vigan ken ni PCpt. Bryan Lopez ti Sinait Municipal Police Station (MPS), nakaawat ti opisinada ti impormasion manipud iti Sto. Cristo Milagroso Hospital a mapapati nga adda biktima ti pammaltog a napan iti nasao nga ospital.
Segun ken ni PCpt. Lopez, insigida a nagresponde ti Sinait MPS ken nabigbig ti biktima a ni alyas “Ogie”, agtawen iti 37, naasawaan, lider ti Igne Gun for hire group (dismantled), ken agnaed iti Brgy. Nagculloban, Sinait, Ilocos Sur, idinto saan pay a nabigbig no asino ti suspek.
Nabigbig pay dagiti kadua ti biktima a dua a menor-de-edad, pakairamanan ti babai nga anakna ken kabsat ti live-in partner-na.
Maibasar iti imbestigasion, tinnambangan isuda ti suspek ket pito ti bala a timmama iti naglugananda, ngem ti biktima laeng ti nadunor nangruna iti ngato a paset ti makinkannigid a likodanna, idinto a saan a naan-ano dagiti kaduana.
Manipud iti Sto. Cristo Milagroso Hospital idiay Barangay Tapao, Sinait, Ilocos Sur ket naipanen ti biktima iti Mariano Marcos Hospital, Batac, Ilocos Norte para iti nayon a pannakatamingna.
Noman pay saan a naamoan no ania ti klase ti paltog a naaraamat iti nasao nga insidente ken ti suspek, agtultuloy ti kameng dagiti pannakabagi ti linteg tapno maidalan iti husto a proseso iti nasao a pasamak. – Augie Arellano
