VIGAN CITY – Nagsagaba iti dunor iti rupa ken tengnged ti maysa a lalaki ta tinagbat ti kabsatna idi alas dies trenta ti rabii idiay Brgy. Sagayaden, Cabugao, Ilocos Sur.
Nakaawat dagiti pannakabagi ti linteg iti tawag manipod ken ni Brgy. Captain Perlita Piros iti nasao a lugar inaig iti pannagbat isu nga insigida a nagrespondeda.
Nabigbig ti biktima a ni Felix Sayaboc, agtawen ti innem a pulo ket walo, baro, mannalon idinto a ti suspek ket ti kabsatna a ni Willie Sayaboc, agtawen ti limapulo ket maysa, naasawaan, mannalon nga agnaed met laeng iti nasao a lugar.
Maibasar iti imbestigasyon ti Cabugao Municipal Police Station, adda iti saan a nagkinnaawatan ti suspek ken biktima agingga nalagipda iti ririda idi kallabes ket nagbinnarada a gappuanan iti panangtagbat ti suspek iti biktima babaen iti bolo isu a nadundunor.
Naipan iti Suero General Hospital ti biktima para iti pannakatamingna idinto a ti suspek ket addan iti Cabugao Municipal Police Station tapno dumalan iti husto a porseso
