VIGAN CITY – Nadundunor ti maysa a driver ta nagbaliktad ti minanehona nga L300 van kalpasan a dinungpar ti maysa nga aluminum van idiay Brgy. Puerta Real, Sto. Domingo.
Nabigbig ti nagmaneho iti Mitsubishi L300 Van a ni Francis Alba, agtawen iti uppat a pulo ket lima, naasawaan nga agnaed idiay Brgy. Sta. Cruz, Sto. Domingo idinto a ti nagmaneho ti Isuzu DMax Alum van a ni Kenneth Garido Suboc, agtawen iti tallopulo ket tallo nga agnaed idiay Bayubay Norte, San Vicente
Iti pannaki-uman ti Bombo Radyo Vigan ken ni PLt. Rodel Marzan nga officer-in-charge iti Sto. Domingo Municipal Police Station, agpada nga agpapabagatan a direksyon dagiti lugan a ti akin-sango ket ti L300 idin agsikko koma ti akin-kannigid a paset ti kalsada ti L300 ket aksidente a tinukbob ti Isuzu a gappuanan ti panagbaliktad ti lugan.
Gapu ti pasamak, nadundunor ti driver ti L300 a ni Alba isu a naipan iti Magsingal District Hospital para iti pannakatamingna idinto a naglibas ti driver ti Isuzu a ni Suboc kalpasan iti insidente.
Segun ken ni Marzan, naglibas ni Suboc ta mapapati a nagbuteng gapu ti panangilibasna ti minanehona a lugan ta maysa isuna a pahinante ngem naduktalan ti panangalana ta adda ti tracking device iti lugan.
Iti panaglibas ni Suboc ket nagturong isuna iti pagtaengan ti gayyemna idiay Cabugao ngem natunton gapu iti nalipatanna nga ID-na iti lugan a minanehona.
