VIGAN CITY – Maysa a lalaki iti nadundunor gapu iti pammagkong idiay Brgy. Nanguneg, Narvacan.
Iti pannaki-uman a Bombo Radyo Vigan ken ni PMaj. Daniel Burgos nga OIC iti Narvacan Municipal Police Station, adda ti naawatda a report nga adda napasamak a pammagkong iti nasao a lugar isu a nagrespondeda ket nakitada iti nadundunor a biktima a nabigbig a ni Jerry Cabuloy, kobrador a taga-San Antonio, Narvacan ta binagkong ti suspek a ni Ariel Delos Santos, agtawen ti duapulo ket walo nga agnaed idiay Brgy. Nanguneg.
Segun ken ni Burgos, manarimaan iti panaginom ti arak ni Cabuloy ken dagiti kakaduana agingga inawisda ni Delos Santos ket bayat ti panagsasangoda adda saanda a nagkinnaawatan agingga dimmanog ni Cabuloy isu a pimmanaw ni Delos Santos.
Nagsubli ni Delos Santos nga adda iti patademna nga isu iti inaramatna kontra ti biktima a nakatamaan ti akin-kanigid nga ima ken nakadaplisan iti tiyanna isu nga insigida a naipan iti Ilocos Sur District Hospital Narvacan para iti pannakatamingna.
Natalgeden ti kasasaad ti biktima idinto a maisagsaganan ti kaso a Frustrated Homicide a maipila kontra ken ni Delos Santos.
