VIGAN CITY – Maiururay iti resulta iti naununeg nga imbestigasyon ti Bantay Municipal Police Station inaig iti napasamak a pammagkong idiay Zone V, Bantay.
Nabigbig ti biktima a ni Jerry Roces agtawen dua pulo ket tallo agnaed ti Brgy. Ayusan Sur, Vigan City ken ti suspek a ni Arvin Bataan agtawen tallo pulo ket dua agnaed ti Brgy. Bayubay Sur, San Vicente.
Segun ti Bantay Municipal Police Station, manarimaan iti imbestigasyonda inaig iti pammagkong ta alaenda pay amin a palawag dagiti nakakita ti pasamak ta adda iti saan a panagkinnawatan ti gropo ni Roces ken Bataan.
Iti pannaki-uman ti Bombo Radyo Vigan kenni Arvin Bataan, suspek ti pammagkong, dinepensaran nalang iti bagina ta iso iti sumaruno a dangran ti gropo ni Roces a saan a bumababa ti lima a lallaki ken immuna a nakabil ti kadduana a ni Romel Recitis agtawen tallo pulo ken agnaed ti Brgy. Bayubay Sur, San Vicente.
Sakbay iti pasamak ket idiay palaeng maysa a pagiinuman idiay ili ti San Vicente nadlaw ni Bataan a kurkursunadaen ida ti gropo ti biktima ket idi pimmanawdan ken mapan mangan ti miki ket nagsasarakda iti paggatangan nga iso metten iti panangkarit da Roces kadakuada.
Immunada a dinanog ken dinangran ni Recitis ket idi isarunoda ni Bataan limmaban ket nabagkongna ti ulo ni Roces iti namin tallo a daras babaen iti mapapati a screw driver.
Ti agdama matamtaming ni Roces ti ospital ngem segun kadagiti nurse a nangtaming kenkuana saan a nauneg ti sinagabana a donor ngem masapol a obserbaran iti doktor.
Kabayatanna maiururay iti resulta ti x-ray ni Bataan ta mapapati a nagsagaba ti fracture iti imana ta nabansag ti dakkel a bato babaen kadagiti kaddua ti biktima a naglibas kalpasan ti insidente.
