VIGAN CITY – Dead on arrival ti maysa a kameng ti LGBT a taga- Brgy Nalvo, Sta. Maria gapu ti panagbekkelna ta insina ti nobyona.
Iti pannaki-uman ti Bombo Radyo Vigan ken ni PLt. Joel Dasargonga OIC, Sta. Maria Police Station, nakaawatda iti report inaig iti panagbekkel ni Garry Divina, agtawen iti duapulo ket pito nga agnaed iti nasao a barangay ken nasarakan a nakabitin ti kayo ti kawkawati a ti kangatona ket nakurang sangapulo a kadapan nga adda naiputipot a straw iti tengngedna.
Segun ken ni Dasargo, insina ti nobyona ti biktima ta adda ti sabali a nobyana ken nasikoganna a pattienda a rason ti panagpakamatayna.
Sakbay iti panagbekkel ti biktima ket madlaw nga adda iti parikotna nga imbingayna iti social media ta adda dagiti postna a pakakitaan a nadagsen ti rikriknaenna.
Naipaagas ti biktima iti Rural Health Unit ti Sta. Maria ngem saandan a naisalakan ti biagna.
