VIGAN CITY – Dead on arrival iti ospital ni Joel Sevilleja, agtawen iti uppat a pulo ket tallo a taga-Brgy. Alinaay, Cabugao gapu ti panagbekkelna.
Nakaawat ti Cabugao Police Station iti tawag manipud ken ni Brgy Capt Melanio Santella a nangipakaammo nga adda ti napasamak a panagpakamatay iti barangayda.
Segun ken ni PMaj. Franco Catalan, 2014 idi naipan iti psychiatrist ti biktima ta adda parikut iti panagpampanunotna ngem naagasan met laeng.
Nupay kasta, idi napalpalabas nga aldaw ket masansan a saan a makaturturog ken kanayon nga agmalmalanga.
Iti inisyal nga imbestigasyon, alas sais kinse iti November 8 idi napan da Mark Segui ken ni Edmar Santella iti taltalon ket nakitada ti biktima a nakabitin iti kayo ti acacia nga isu ti gundaway nga impakaammodan iti kapitan.
Alas kuatro iti agsapa idi kalman ket sapsapulenen ti pamiliana ti biktima ngem saanda a nasarakan.
