VIGAN CITY – Maysa a lalaki iti aksidente a napaltoganna ti luppona bayat ti panagmotorsikloda ti kanakanna idiay Brgy. Margaay, Cabugao, Ilocos Sur.
Iti pannaki-uman ti Bombo Radyo Vigan ken ni PMaj. Juan Jhayar Maggay, agturong iti karayan ti biktima a ni Gary Simbe Sumagit, agtawen iti tallopulo, naasawaan, awanan ti trabaho nga agnaed idiay Margaay, Cabugao kaduana ti nagmaneho ti motorsiklo a kanakanna a ni Jester Sumagit Sajor, agtawen iti duapulo ket uppat, baro, awanan trabaho nga agnaed met laeng iti nasao a barangay idin aksidente a naiputok ni Gary ti igiggamanna a COLT AR 15 Cal. 45 a gappuanan iti pannakatama ti bala iti akin-kannawan a luppona.
Naipan ti biktima iti Suero Hospital para iti pannakatamingna ngem idi naamuan a mapapati a biktima ti pammaltog ti biktima ket insigida da nga impakaammo kadagiti otoridad isu a nangisayangkatda iti imbestigasyon.
Segun ken ni Maggay, saan nga agsusurot iti ibagbaga dagiti dua ta agdumada iti sarita ken paglibakanda nga adda iti nangpaltog kadakuada.
Nupay kasta insuko ti paltog ni Jester isu nga addan iti kustodiya iti Cabugao Municipal Police Station para iti documentation ken proper disposition.
Iti agdama, adda iti Ilocos Sur Provincial Hospital – Gabriela Silang ti biktima para iti panagpalaingna ken maisagsaganan ti kaso kontra kadagiti dua gapu iti panaglabsingda iti Republic Act 10591 wenno ti Comprehensive Firearms and Ammunition Act.
