VIGAN CITY – Matamtaming idiay Metro Vigan Cooperative Hospital ti maysa a lalaki a nabagkong idiay Sitio Bessang, Brgy. Pug-os, Cabugao.
Nabigbig ti biktima a ni Ramil Cabacang Mapa agtawen ti lima pulo ket innem ken dagiti suspek a da Liam Royce Gaspar ken Reynante Gaspar, kayong ti biktima ken agpapada nga agnaed ti nasao a barangay.
Iti pannaki-uman ti Bombo Radyo Vigan kenni Pol. Major Franco Catalan, hepe ti Cabugao Municipal Police Station, napan ti biktima iti pagtaengan ni Liam Royce ta nagpasken agingga a nagprobukar ti suspek a nangiruar ti kutsilyo ket inagaw ti gupo ni Gaspar ket kalpasanna pimmanaw ni Mapa.
Nagsubli ti biktima a nakaiggem ti kutsilyo ket ginandatna a bagkongen ti asawana a ni Belinda Gaspar ngem nakalisi ken naggiginnubal dagiti dua a suspek ken biktima agingga a nabagkong ni Mapa.
Iti agdama, awan pay laeng manipud kadagiti dua a suspek ti mangaklun no siasino kadakuada ti nakaduyok iti biktima.
Pinasingkedan ti asawa ti biktima a ni Belinda Gaspar ti nasao a pasamak ta saan da nga inimbitaran ti asawana ket napan latta nakiinninom ken nagprobukar.
Naammuan a nabayagen a nagsina dagiti dua nga agasawa gapo iti kanayon panangdangran ti biktima ti asawana ta agimimon.
