VIGAN CITY – Dead on Arrival ti maysa a lalaki a naaksidente idi rabii idiay Brgy. Pantay Fatima, Vigan City.
Nabigbig ti natay a ni Floriano Robinol Jr., agtawen ti uppat a pulo ket tallo, naasawaan, agnaed idiay Brgy. Balaleng, Bantay a nagmaneho iti Honda Wave 100 motorcycle.
Maibasar iti inisyal nga imbestigasyon, daldalyasaten ni Robinol iti provincial road iti nasao a barangay idi nadanonna iti agsikko a paset idin naawanan iti kontrol iti manibelna a gappuanan iti pannakaidungparna iti kongkreto nga alad iti laud a paset iti kalsada.
Nagsagaba iti dunor iti nadumaduma a paset iti bagi ni Robinol isu a naipan iti metro Vigan Hospital ngem naideklara a DOA.
Kabayatanna, manarimaan pay laeng iti panangammo ti pannakabagi ti linteg iti gatad iti nadadael iti aksidente.
