VIGAN CITY – Dead on arrival ti biktima a ni Ernesto Jimenez Savedra, naasawaan nga agnaed idiy Brgy. Bagani Campo, Candon City ta namindua a daras a napaltogan idiay Barangay Sapang, Sta Lucia, Ilocos Sur.
Bayat a nakalugan ti biktima iti motorsiklona a Yamaha mio kaduana da Eden Ragandap Calip, agtawen ti tallopulo ket maysa nga agnaed idiay Brgy. Turod, Sta. Cruz ken Anabel Calip Haduca, agtawen ti uppat a pulo ket walo nga agnaed idiay Brgy. Conconing East, Sta. Lucia ket adda dagiti saan pay nabigbig a suspek a nangpaltog ken ni Savedra.
Iti panakipapatang ti Bombo Radyo Vigan kenni PSSG Loreto Rabago, investigator on case ti pammaltog a napasamak, agaw-awid ti biktima a naggapu iti natayan idi napasamak ti insidente.
Naipan ti biktima iti Ilocos Sur District Hospital – Sta. Lucia babaen ken ni Brgy. Kagawad Rosendo Mangornong kaduana dagiti kinalubbon iti motorsiklo ti biktima ngem naideklarar a dead on arrival babaen ken ni Dr. Jiezelle Javillonar nga attending physician-na.
Nagsagaba ti biktima iti dua a tama iti barukongna puon ti nakatayan na.
Iti agdama, agtultuloy pay laeng ti panangkalap dagiti pannakabagi ti linteg ti impormayon tapno maamoan nu ania iti motibo ti pammapatay.
VC – PSSG LORETO RABAGO
