Nadunor ti maysa a lalaki a binagkong ti kinainumanna idiay Barangay Rosario, Cervantes, Ilocos Sur.
Ti biktima ket maysa a lalaki nga agtawen iti duapulo ket maysa, agnaed iti Comillas North Cervantes.
Ti met suspek ket lalaki nga agnaed iti Barangay Tablak, Mankayan, Benguet.
Maibasar iti inisyal nga imbestigasion, agin-inom ti biktima, suspek, ken gayyemda iti maysa a boarding house idin ta rimsua ti saanda a pagkikinnaawatan.
Idi agawid ti biktima kadua ti maysa kadagiti gayyemna, bigla a binagkong daytoy ti suspek iti namin-dua a daras sakbay a naglibas.
Naitaray iti ospital ti biktima kalpasan a nagsagrap iti dunor ti ulona.
Agtultuloy ti imbestigasion dagiti pannakabagi ti linteg ken maisaysayangkaten ti hot pursuit operation para iti pannakakemmeg ti suspek.
