VIGAN CITY – Agtultuloy iti imbestigasyon dagiti pannakabagi ti linteg inaig iti pannakatay ni Jerwin Rodrigo Inofinada, agtawen iti tallopulo ket uppat, agnaed idiay Barangay Carusipan, Cabugao, ta napaltogan idiay Sitio Sagsagat, Barangay Cuantacla, Cabugao.
Iti pannaki-uman ti Bombo Radyo Vigan ken ni PMaj. Juan Jhay-ar Maggay a Chief of Police, bayat ti panagmotorsiklo ti biktima iti Yamaha Ego Solariz a kulay nangisit ken puraw ket inasitgan ken pinaltogan dagiti saan pay a nabigbig a suspek a nakamotorsiklo met laeng.
Segun ken ni Maggay, adda ti uppat a tama iti bala ti paltog ti biktima isu a naipan iti Pira Clinic and Hospital, Cabugao ngem naideklarar a dead on arrival.
Nasarakan ti walo nga empty shell ti caliber 45 a paltog iti crime scene nga isu iti mapapati nga inaramat dagiti suspek.
Kitkitaenen dagiti pannakabagi ti linteg ti posible a motibo ken nu siasino ti adda iti likodan ti pammapatay.
Maipalagip nga idi kallabes ket adda kaso ti biktima ta idi laeng napan a bulan ket nakasoan ti carnapping gapu ti tinakawna a kurong-kurong, nakemmeg idi tawen 2013 gapu ti kasona iti illegal drugs ken adda pay unvalid a report ti mapapati a panagsublina ti nasao a madi nga aramid.
VIDEO – PMAJ JUAN JHAY-AR MAGGAY
